យើងម្នាក់ៗ ឬជាតិសាសន៍នីមួយៗ ពុំមាននរណាចង់ស្ថិតនៅក្រោម​ការគាបសង្កត់​របស់​អ្នក​ដទៃ ឬជាតិ​សាសន៍​ដទៃ​ឡើយ។​ ដូច្នេះ អ្វី​ទាំង​នេះវា​ទាម​ទារ​ឲ្យ​យើង​ត្រូវ​មាន​ពុទ្ធិ​ស្វែង​​​យល់​ ក្នុង​​​កម្រិត​​មួយ​ដែល​អាច​ប្រៀប​ធៀប​ជា​មួយ​នឹង​គេ​បាន... បានន័យថា អ្វី​ដែល​គេ​ចេះ​ដឹង​ ​យើង​ត្រូវ​តែ​បាន​ចេះ​ដឹង​ព្រមៗ​ជា​មួយ​គេ។ ការ​ដែល​​គេ​ដឹង តែ​យើង​មិន​ដឹង​វា​នឹង​ធ្វើ​ឲ្យ​យើង​ត្រូវ​រត់​ត្រុកៗ​ពី​ក្រោយ​គេ​ជា​រហូត មិន​ថា​ជា​រឿង​​បុគ្គល ឬ​ជា​រឿង​ប្រទេស​ជាតិ​ឡើយ។​

សៀវភៅ “យុទ្ធសាស្ត្រទម្លុះគោលដៅ” បានបង្ហាញពីឧទាហរណ៍ជា​ច្រើន ដែល​ផ្តល់​នូវ​បទ​ពិសោធន៍ និង​ពុទ្ធិ​ជា​យុទ្ធ​សាស្ត្រ ប្រកប​ដោយ​ភាព​ ឈ្លាសវៃ ដើម្បី​ជា​ដើម​ទុន​ក្នុង​ការ​ហែល​ឆ្លង​សមុទ្រ​នៃ​ដំណើរ​ជីវិត ឈាន​ទៅ​រក​ជោគ​ជ័យ​ក្នុង​ជីវិត​និង​ការងារ។

ម្យ៉ាងវិញទៀត យុទ្ធសាស្ត្រនីមួយៗ តែងមានបទវិភាគបន្ថែម ដែល​ជួយ​ឲ្យ​អ្នក​អាន​បាន​ថ្លឹង​ថ្លែង​ក្នុង​ការ​ប្រើ​យុទ្ធ​សាស្ត្រ ដែល​ក្នុង​ករណី​ខ្លះ យើង​រៀន​ដើម្បី​អនុវត្ត​តាម​ ហើយ​ករណី​ខ្លះទៀត យើង​រៀន​ដើម្បី​ឲ្យ​ចេះ​បែង​ចែក​ពី​អ្វីល្អ អ្វីអាក្រក់ ដើម្បី​កុំ​ឲ្យ​ធ្លាក់​ចូល​ក្នុង​អន្ទាក់​របស់​អ្នក​ដទៃ​ដោយ​មិន​ដឹង​ខ្លួន​។​